Merkatu Segmentazioa eta Enpresa Irudia: Gakoak

Merkatu Segmentazio Estrategiak

Merkatu segmentazioa enpresa batek bere produktuak edo zerbitzuak eskaintzeko erabiltzen dituen estrategiei dagokie, bezeroen behar eta ezaugarrien arabera.

1. Berezi-gabeko edo Masa Estrategia

Enpresak, bezero multzo eta behar mota desberdinak daudela jakin arren, produktu eta posizionamendu berberarekin egiten du eskaintza.

• Abantaila: Kostuen aurrezpena, erosle guztientzako produktu bera jartzen dutelako salmentan.
• Desabantaila: Kontsumitzaile guztien beharrak asetzeko zailtasuna du.

2. Estrategia Bereiztua

Enpresak produktu-eskaintza eta posizionamendu berezi bat izango du merkatu-segmentu bakoitzean.

• Abantaila: Enpresak, atenditzen dituen segmentu guztien beharrak modu egokian asetzen ditu.
• Desabantaila: Estrategia garestiena da, enpresak baliabide handiak eduki beharko baititu.

3. Estrategia Kontzentratua

Enpresak segmentu jakin batzuetan biltzen du ahalegina, eskaintza segmentu horien ezaugarrietara egokituz (baliabide gutxi dituelako edo abantaila lehiakorra duelako).

• Abantaila: Erosleen beharrak modu egokian asetzen ditu.
• Desabantaila: Estrategia arriskutsua da, bezeroen gustuak alda daitezkeelako edo eskaria murriztu daitekeelako.

Enpresa Kultura, Irudi Korporatiboa eta Gizarte Erantzukizuna

Gizarteek pertsonen portaeran eragiten duen berezko kultura dute. Enpresek ere beren kideengan eragiten duen kultura dute: balio-multzo eta sinesmen multzo bat, kideek partekatutakoak.

Enpresa Kulturaren Oinarriak

Enpresa kultura idatzizko arau eta printzipioetan oinarritzen da, hala nola:

• Misioa

  Enpresaren izateko arrazoia definitzen du:

  • Zeintzuk gara?
  • Zer egiten dugu?
  • Zeinentzako egiten dugu lan?

• Ikuspegia

  Enpresak etorkizunean lortu nahi duen lekua edo egoera adierazten du:

  • Zein da gure negozioaren desiratutako irudia?
  • Zer jarduera garatuko ditugu etorkizunean?

• Balioak

  Enpresaren ezaugarriak dira, haren kideen portaeran eragiten dutenak. Enpresaren balio etiko nagusiak:

  • Bezeroari begira jardutea.
  • Jasangarritasuna.
  • Pertsonekiko interesa.
  • Gizarte erantzukizuna.
  • Talde-lana.
  • Zintzotasuna.
  • Komunikazio argia eta gardena.

Irudi Korporatiboa

Bezeroek eta gizarteak enpresari buruz hautematen dutena da. Enpresak transmititzen dituen balio eta sentsazioen multzoa.

Irudi korporatiboa honako hauen bidez transmititzen da:

• Logotipoa, imagotipoa eta isotipoa, marka eta izen komertziala.
• Marketin eta publizitate kanpainak.
• Bideo korporatiboak.
• Gizarteak ikusitako eguneroko jokaera.

Logotipoa edo Logo

Hitzek soilik eratutako identifikatzailea da (adibidez, Yoigo).

Isotipoa

Sinbolo bat bakarrik da, eta berez ulergarria da (adibidez, McDonald's-eko M).

Imagotipoa

Testua eta sinboloa argi eta garbi bereizita dauden eta bakoitzak bereiz funtziona dezakeen ikono-testu multzoa da (adibidez, Carrefour).

Isologoa

Testua eta ikonoa zatiezinak diren eta elkarrekin bakarrik funtzionatzen duten multzoa da (adibidez, Burger King).