Europar Batasuna: Sorkuntza, Politikak eta Erronkak

Europar Batasunaren Sorkuntza

Zergatik sortu zen EB?

Bigarren Mundu Gerra amaitutakoan, herrialdeetako ekonomiek krisi sakona gainditu behar izan zuten. Europako zenbait herrialdek beren arteko akordioak izenpetu zituzten, produktuen, kapitalen eta pertsonen zirkulazioa erraztuko zuen merkatu bakarra eratzeko.

Lehena Europako Ikatz eta Altzairuaren Erkidegoa izan zen, eta geroago Europako Ekonomia Erkidegoa eta Europar Batasuna etorriko ziren. Merkatu bateratu bat eratzeko neurriak hartu dira, muga politikoak muga ekonomikoak ere izan ez zitezen. EBk nabarmen egin du aurrera merkataritza eta ekonomia integrazioan.

Europar Batasunaren Politikak

Hauek dira aipagarrienak:

• Nekazaritza Politika Bateratua (NPB): Produktibitatea handitzea, EBko herrialdeetan nekazaritza produktuen hornikuntza ziurtatzea eta nekazarien bizi-maila bermatzea. Horretarako diru-laguntzak bideratzen ziren.
• Diru Politika Bateratua: Europako Banku Zentralak, diruaren prezioa finkatzeaz gain, estatuetako inflazioa eta ekonomiaren hazkundea kontrolatzen ditu.
• Kohesio Politikak: Garapen aldetik ahulagoak diren eskualdeak eta estatuak suspertzekoak.
• Atzerriari eta Segurtasunari buruzko Politika Bateratua: EBk potentzia diplomatiko eta militar gisa duen papera zehaztea eta sendotzea du helburu.
• Zirkulazio Askearen Politika: Batasuneko estatuetan zehar pertsonen zirkulazio librea bermatzeko politika, Europar Batasuneko 22 estatuk sinatu dutena.

Europar Batasuna Munduan

Europar Batasuna potentzia bat da munduan: merkataritza eta finantza gune nagusia da, kontsumo merkaturik handiena du, eta bizikidetza eredua da.

Batasuneko estatu guztiek baldintza batzuk bete behar dituzte: erregimen demokratikoa izatea, giza eskubideak errespetatzea eta ingurumen politikak sustatzea. Gainera, Hirugarren Munduaren garapenean laguntzeko inbertitzaile nagusia da.

EBren Erronkak eta Ahulguneak

EBren etorkizunak ahulgune handiak ditu. Integrazio politikoa sendotzeko asmoa dago, baina erreferendumen emaitzek bidea oztopatu dute, Frantzian eta Holandan ezezkoa nagusi baitzen. Zenbait herrialdek EBn sartzeko eskaera egina dute.

Eskualdeko Politika eta Funtsak

EB munduko eremu aberatsenetako bat da. Kohesio ekonomiko eta sozialerako politika bultzatzen da, eskualde pobreen garapena bultzatzeko helburuarekin.

Funtsak Batasunaren urteko aurrekontutik iristen dira eta Europar Batzordeak administratzen ditu, Eskualdeen Batzordeari kontsulta egin ondoren. Kontsultarako batzarra 1994an sortu zen.