Artearen Maisulanak: Konparaketa eta Azterketa
Eros eta Psike
Eros eta Psike eskultura Antonio Canova eskultore italiarrak egin zuen 1787 eta 1793 urteen artean. Eskultura estilo neoklasikokoa da. Neurriak 155 x 168 cm-koak dira. Bultu biribilekoa da, marmolezkoa, eta aurrealdetik ikusteko egina dago. Canova Apuleioren Urrezko Astoa obran inspiratu zen, eta eskultura honek maitasuna irudikatzen du. Forma klasikoetan inspiratu zen pertsonaia gazteak irudikatzeko ereduan, eta teknikaren aldetik bukaera perfektua da.
Eros eta Psike musu bat emateko zorian dauden momentuan, haien aurpegiek espresioa daukate, baina ez dira Michelangeloren eskulturak bezain espresiboak. Bi ardatz daude, 'X' forma osatzen dutenak, baina Psiqueren hankaren ardatza luzeagoa da. Bi ardatzen erdigunea pertsonaien buruetan dago. Aipatzekoa da, halaber, eskultura honen argi-ilun efektuak eta Canovaren teknika bikaina.
Azkenik, obra hau John Campbell jeneral ingelesak enkargatu zuen, baina Henry Hoppe bildumagileak lortu zuen, eta, gero, Joaquin Murat Napoleonen mariskalak bereganatu zuen, bere gaztelu bat apaintzeko asmoz. Gaur egun, Louvre museoan dago (Paris, Frantzia).
Maiatzaren 3ko Fusilatzeak
Maiatzaren 3ko fusilatzeak Goyak egin zuen 1814an. Margolanaren neurriak 268 x 347 cm-koak dira, eta erabilitako teknika oihal gaineko olio-teknika da. Goyak erabilitako estiloa zaila da sailkatzen, baina erromantizismora hurbiltzen da gehien. Gaia historikoa da; hain zuzen ere, madrildar batzuk maiatzaren 2an frantsesen aurka matxinatu ondoren, maiatzaren 3an frantsesek, mendeku gisa, matxinatu batzuk fusilatu eta hil zituzten. Goyak azken eszena hau irudikatzen du, Espainiako behin-behineko gobernuak enkargatu ondoren.
Koadro honek naturalismo eta errealismo osoz deskribatzen ditu pertsonak eta paisaia (bi planoko banaketa sortuz), bortizkeria, heriotza eta sufrimendua irudikatu nahian. Koadroa bi zatitan banatzen da: frantsesak eskuinaldean eta madrildarrak ezkerraldean. Begirada koadroaren erdian kokatuta dagoen mutilari zuzenduta dago; izan ere, argia farol batetik ateratzen da, baina erdiko pertsonaia distiratsuegi agertzen da.
Aipatzekoa da aurpegien espresionismoa: fusilatuak izango direnen aurpegietan izua adierazten da; frantsesen aurpegiak, ordea, ez dira irudikatzen.