Kostako inguruetan, turismoaren eraginez, biztanleriak gora egiten du.
Landa eta mendi-inguru batzuetan, eta gainbeheran dauden hiri historiko batzuetan, turismoak despopulatzea geldiarazi du, eta eskulangintza eta tradizioak berpiztea eragin du.
Populazioan dituen ondorioak
Kostaldean, turismoak hiri-populatzea zabaltzen du eta konurbazioak sortzeari mesede egiten dio.
Landa-espazio, mendi-espazio eta hiri-espazio batzuetan, turismoak eraikitako ondarea zaharberritzen lagundu du.
Ondorio ekonomikoak
Turismoak enplegu handia sortzen du, bai turismo-zerbitzuetan, bai zerbitzu mistoetan (turistentzat eta bertakoentzat).
Beste jarduera ekonomiko batzuetan efektu biderkatzailea du, turismo-eskariak gora egitean suspertu egiten baitira.
Herrialdeari aberastasuna ematen dio.
Merkataritza-balantza konpentsatzen du, kanpoko zorpetzea geldiaraziz.
Garraio-politikan eragina du. Garraio-politikaren bidez, turismo-nukleoei irisgarritasun ona eman nahi izan zaie.
Ondorio politiko, kultural eta soziologikoak
Turismoaren bidez, herrien arteko hurbilketa eta kulturen arteko harremanak sustatzen dira, estatuen arteko elkar-ulertze politikoari mesede eginez.
Turismoak tokiko gizartean eragina du: eragin positiboa gizarte-aldaketa eta modernizazioa suspertzen dituenean; eta eragin negatiboa, bertako ohiturak eta identitate-ikurrak galtzea dakarrenean, edo egoiliarren bizi-kalitatea okertzen duenean zerbitzuetan eta azpiegituretan pilaketak eragiteagatik.
Lurraldearen antolamenduan dituen ondorioak
Kostako inguru turistikoenetan, turismoak espazio hurbilak beharrizanen arabera antolatzen ditu. Modu horretan, aisirako inguruak edo oinarrizko hornikuntzak ematen dituzten zerbitzuen periferiak bihurtzen dira.
Landa-turismoko eta mendi-turismoko inguruetan, turismoak gatazkak sor ditzake nekazaritza-jarduerekin, edo jarduera horiek bertan behera uztea eragin dezake.
Hiri historikoetan, hirigune zaharrak turistaren zerbitzurako jardueretan espezializatzen dira, eta periferietan bigarren etxebizitzak edo eskariari erantzuteko hotelak kokatzen dira.
