Talde-dinamika eta lidergoa: taldearen ezaugarriak, lidergo motak eta rolak

Talde baten ezaugarriak

Talde guztiek beraiek definitzen eta identifikatzen dituzten ezaugarri batzuk dituzte, eta talde bat osatzeko ezinbestekoak dira ezaugarri hauek:

1. Kideen arteko elkarrekintza sistema bat dago: Taldeak kideen artean harreman bat izan behar du, baita besteekiko beharrak identifikatu ere, horrela proposatutako helburuak lortzeko.
2. Helburu komun batzuk daude: Helburu hauek argiak, eragileak eta talde guztiaren parte-hartzea ahalbidetzen duten helburuak dira.
3. Taldeak arau sistema bat izan behar du partaideen jarrerak kontrolatzeko: Hau ezinbestekoa da giro ona egoteko. (Terapeuta zuzendari moduan, taldearen arauek antolatzen dute).
4. Talde kontzientzia: Kideak pixkanaka-pixkanaka indibidualki pentsatzetik, taldearengan pentsatzera pasa behar dira, talde bezala jokatzen hasteko.
5. Talde kohesioa: Kideak taldearen parte izateaz zein neurritan dauden pozik.

Lidergo motak

Lidergoa taldearen egituraren barruan kokatzen den kidearen rol garrantzitsuenetako bat da. Liderrak taldea helburu jakin batzuetara gidatzen du, beti kohesionatuta mantenduz. Bilera batean, liderrak dinamizatzaile rola izan behar du.

Lidergo motak: Liderrak gauzak nola egiten dituenaren arabera

• Larderiazko liderra: Taldeak lanean erabili behar dituen prozedurak, teknikak eta ekintzak zehazten ditu, baita lan bat garatzeko orduan kideen arteko harremana ere.
• Lider demokratikoa: Taldeko kideen artean harreman jariakor bat izaten laguntzen du eta haien beharrak asetzen saiatzen da; horregatik, liderrik onena dela jotzen da.
• Laissez-faire liderra: Talde-ekintzetan ez du parte hartzen, taldeari bakoitzak bere erabakia hartzen uzten dio eta materiala eta informazioa eskatzen zaionean eskuragarri jartzen ditu.

Liderraren ezaugarri pertsonalak

Liderrak bere eginkizuna errazteko hainbat ezaugarri izan behar ditu, adibidez:

1. Oreka eta heldutasun psikikoa izan behar du.
2. Taldekideen gaitasunetan konfiantza izan behar du.
3. Malgutasun mentala eta emozionala izan behar du.
4. Besteenganako irekitasuna, tolerantzia eta erabilgarritasuna izan behar du.
5. Pertsonen arteko gaitasuna, besteekin harreman funtzionalak ezartzeko ahalmena dakarrena.

Talde batean agertzen diren rolak eta haien ezaugarriak

Rola kanpotik agindutako jokaera da, sozialki egingo duguna espero dena. Taldean, rol hauek funtzionamenduaren eta taldean onartzen diren zereginen arabera agertuko dira, eta positiboak edo negatiboak izan daitezke taldearen funtzionamendurako.

Rol positiboak

Rol positiboen artean, hauek azpimarratzen ditugu:

• Lider naturala: Taldeko pertsona sendoa da, eta gainerako kideek bere autoritateagatik ezagutzen eta errespetatzen dute.
• Orientatzailea: Taldeak jorratu behar dituen ideietara eta gaietara bideratzen ditu.
• Moderatzailea: Taldea lasaitzeko ardura du, taldeen arteko tentsioak gutxitzen ditu eta ideiak emozioetatik baztertuz bideratzen ditu.
• Idazkaria: Taldearen "memoria" da; hau da, taldeak sortutako informazioa idazten/gordetzen du.
• Aditua: Taldeari informazio baliotsua mahai gainean jartzen dio, baina batzuetan sasijakintsuaren rola hartzen du.
• Argitzailea: Azalpenak eskatzen ditu, jorratu beharreko puntuak zehazten ditu eta taldeari argi eta garbi lan egiten laguntzen dio.
• Animatzailea: Taldea estimulatu eta taldeko kideen parte-hartzeaz arduratzen da.
• Azeleratzailea: Taldeak egiten dituen bilerei erritmo altua jartzen die, baina askotan erritmo horrek taldeari kalteak besterik ez dizkio sortzen.
• Liderra: Autoritate gehiena duen pertsona da, eta taldearen barruan nahi duen funtzioa bete dezake: terapeuta, hezitzailea, animatzailea, etab. bezala.