Errealismoaren Ezaugarriak eta XIX. Mendeko Testuingurua

Errealismoaren Ezaugarri Nagusiak

• Zehaztasuna: Idazleek errealitatearen analisi zientifikoa egin nahi dute. Horretarako, zehaztasun handiz deskribatzen dituzte giroak, ohiturak eta pertsonaiak.
• Behaketa irudimenaren gainetik: Erromantizismoan irudimena nagusi zen, baina errealismoan behaketa garrantzitsuagoa da. Idazleek hizkuntza desberdinak erabiltzen zituzten maila sozial ezberdinetako pertsonaiak aurkezteko.
• Jarrera salatzailea: Errealistek askotan gizartea salatu nahi zuten, eta bizi-baldintza gogorrak aurkezten dituzte haien lanetan, hala nola diruarekin, boterearekin eta arazo politikoekin lotutakoak.
• Sinesgarritasuna: Erromantizismoan nagusi ziren giro exotikoen aurrean, errealistek pertsonaien eguneroko bizitza kontatu nahi dute.
• Pertsonaia mota berriak: Beren garaiko arazo politiko eta sozialen ispilu dira. Langileak agertzen badira ere, eleberriaren protagonistak burgesak izan ohi dira.
• Eleberria genero nagusia: Idazleek eleberrian aurkitu zuten beren kezkak eta arazoak islatzeko biderik egokiena. Gehienetan, aldizkarietan eta egunkarietan atalka argitaratzen ziren. Hizkuntza ulergarria eta argia zen, eta narratzailea orojakilea izan ohi zen.
• Deskribapena: Deskribapenak ugariak eta zehatzak dira (paisaienak, giroenak eta pertsonaienak), errealitatea modu konplexuan islatzea baitzen helburua.

XIX. Mendeko Testuingurua

Zientzia eta Teknologia

Zientziaren arloan, Claude Bernard mediku frantziarrak zientziaren oinarri teorikoak definitu zituen, eta bere lanik ezagunena Medikuntza esperimentalaren ikerketarako sarrera da. Charles Darwin beste zientzialari ospetsu bat izan zen, eboluzioaren teoria planteatu zuena. Bestalde, Gregor Mendelek herentzia genetikoa ikertu zuen, eta horretan dago naturalismoaren abiapuntua.

Teknologia berriek asko aldatu zuten eguneroko bizimodua. Asmakizun garrantzitsuak izan ziren, besteak beste, telegrafoa eta telefonoa. Beste batzuk, teknologia berrien bidez hobetu ziren, hala nola trena eta lurrun-ontzia. Sendabide berriak ere garatu ziren, aspirina, adibidez.

Marxismoa

1848an Manifestu Komunista argitaratu zen. Haren aurrekariak sozialista utopikoak izan ziren, kapitalismoa salatu zutenak. Karl Marxek teoria politiko eta ekonomiko berri bat sortu zuen, eta mundua ulertzeko proposamen iraultzaile bat egin zuen.

Eleberriaren Gorakada

Errealismoa, batez ere, eleberriaren bitartez adierazi zen giza errealitatea deskribatzeko. Garaiko aldizkarietan eta egunkarietan argitaratzen zituzten eleberriak atalka, publiko zabal batengana iritsiz.

Eleberri errealistaren ezaugarriak:

• Egiantzekotasuna: Gertakariak sinesgarriak dira.
• Pertsonaien analisi psikologikoa: Sakontasun handiz aztertzen da pertsonaien barne-mundua.
• Giro eta ohituren deskribapena: Garaiko gizartea zehaztasunez irudikatzen da.
• Gizakiaren eta gizartearen arteko gatazkak: Indibiduoaren eta bere ingurunearen arteko tentsioak kontatzen dira.
• Hizkuntza argia eta erraza: Estiloa zuzena eta ulergarria da.
• Narratzaile orojakilea: Dena daki, bere iritzia ematen du, pertsonaien iragana eta pentsamenduak ezagutzen ditu, haien jokabideak kontrolatzen ditu eta, batzuetan, irakurleari zuzenean hitz egiten dio.