Enpresaren Finantzaketa Iturriak eta Haien Kostuak
Enpresaren Finantzaketa Iturriak
Enpresak, zehazki, kreditu-kontu bat eska dezake. Hona hemen finantzaketa-tresna nagusiak:
- Merkataritza-kreditua: Enpresak hornitzaileei egindako erosketak zorretan uztean lortzen duen finantzaketa automatikoa da. Enpresak erositako materialekin eta hornidurekin lan egin dezake, eta fakturak ordaindu arteko denboran, enpresa finantzaketa jasotzen ariko da.
- Efektu-deskontua: Epemuga igaro baino lehen, letra edo ordainduko moduan formalizatutako bezeroen zorrak finantza-erakunde bati laga diezazkioke enpresak, eta finantza-erakundeak zorren zenbatekoa aurrez ordainduko du kontuan, komisioengatiko eta interesengatiko zenbateko batzuk kendu ondoren.
- Factoring: Enpresen beste finantzaketa-mota bat da, bezeroen gaineko kreditu-eskubide guztiak (fakturak) faktore izeneko enpresa bati saltzean datzana. Faktoreek berehalako likidezia eskaintzen dute, eta ordaindu gabekoen eta zordun berankorren arazoak kentzen dizkiote enpresari.
- Confirming: Kreditu-erakundeek enpresei hornitzaile nazionalei egin beharreko ordainketak kudeatzeko eskaintzen dieten finantza-zerbitzua da.
- Finantzaketa-funts espontaneoak: Adibidez, enpresak Ogasunari edo Gizarte Segurantzari zor dizkion zenbatekoak, dagokionean ordaindu beharrekoak. Izan ere, langileek egunero kobratuko balute, enpresak mailegu bat eskatu beharko lioke bankuari, inbertsio-maila berari eutsi ahal izateko.
Finantzaketa-iturriaren kostua eta hautaketa
Enpresak erabiltzen dituen baliabide gehienek kostuak eragiten dituzte. Batez besteko kosturik baxuena eragiten duen finantzaketa-iturria lortzen saiatuko da enpresa. Izan ere, hala, mozkin handiagoa lortuko du egindako inbertsioaren bidez.
Finantzaketa-iturriaren araberako ezaugarriak:
- Baliabide propioak: Enpresak ez du interesik edo dibidendu jakinik ordaindu behar kapitalarengatik eta erreserbengatik, besteak beste, baina finantza-kostu bat dute. Finantza-kostu horrek aukera-kostuaren balio bera du.
- Epe luzerako besteren baliabideak: Modalitate guztietan kontratu bat dago beti, eta hor zehaztuta daude maileguaren baldintzak eta zer interes ordaindu beharko den (kostuak).
- Epe laburrerako besteren baliabideak: Finantzaketa-iturri espontaneoek ez dute kosturik izaten. Hornitzaileen kredituak kostu inplizitu bat izango du, eskura ordaintzeagatik deskontu bat eskaintzen badute.