Bigarren Mundu Gerraren Bilakaera (1939-1945)

Bilakaera: (1939-1945)

Ezaugarriak

1. Mundu gerra

Gerra hau munduko lehenengo benetako gerra gisa har dezakegu. Fronteak ez ziren Europara mugatu; operazio militarrak Afrika, Asia eta Ozeano Barera hedatu ziren. Potentzia protagonista nagusiak ez ziren europarrak soilik izan; AEB, Japonia eta Sobietar Batasuna ere funtsezkoak izan ziren.

2. Zientifikoki planifikatutako gerra

Zientzia, teknika eta ekonomia gerraren zerbitzura jarri ziren, bereziki Alemaniaren eta Japoniaren kasuetan. Arma berriak garatu ziren:

• Tankeak: Alemanek borrokarako tresna autonomo gisa garatu zituzten, gerraren lehen fasean nagusitasuna emanez.
• Radarrak: Britainiarrak aitzindari izan ziren teknologia honetan.
• Bonba hegalariak: Alemanen V-1 eta V-2 ereduak.
• Hegazkin flota eta bonba atomikoa: AEB-ek garatutako teknologia aurreratuak.

Gerra aldatu egin zen Ameriketako Estatu Batuak sartzerakoan.

Gerraren faseak

1. Alemaniaren nagusitasuna (1939-1941)

Gerraren lehen aldi honetan, Alemaniako gerra-industriaren sendotasunak nagusigoa eta iniziatiba eman zion Hitlerri. Poloniak berehala amore eman zuen, alemanen eta errusiarren eskuetan eroriz.

1940. urtean, Norvegia, Danimarka, Herbehereak, Belgika eta Maginot defentsa-lerroa gainditu ondoren, naziek Frantzia inbaditu zuten. Ekainaren 14an Hitler Parisen sartu zen eta 22an frantsesek armistizioa eskatu zuten. Frantziako iparraldea eta Atlantikoko kostaldea Alemaniaren eskuetan geratu ziren. Hego-erdialdean, III. Reich-ak gobernu “txorimalo” bat sortu zuen Vichy-n, Petain mariskalak zuzenduta.

Britainia Handia izan zen nazien erasoari aurre egin zion potentzia bakarra. Hitler britainiarrekin bake batera iristen saiatu zen, baina Winston Churchill lehen ministroaren gobernuak eustea eta gerrarekin jarraitzea erabaki zuen. Hitlerrek Ingalaterra etengabe bonbardatuz erantzun zuen (Ingalaterrako Guda), baina britainiarrek ez zuten amore eman.

Alemaniaren hurrengo helburua Europako erdialdea eta Balkanak izan ziren. Hitlerrek itunak sinatu zituen Hungaria, Errumania, Eslovakia, Bulgaria eta Jugoslaviarekin. 1941. urteko apirilean naziek Jugoslavia inbaditu zuten eta, italiarrekin batera, Grezia ere bai.