Kanpo-Migrazioak Espainian: Tradizionalak eta Gaur Egungoak

Kanpo-migrazioak herrialde baten mugetatik kanpo izaten diren biztanleria-mugimenduak dira. Bi motatakoak bereizten dira: tradizionalak eta gaur egungoak.

Kanpo-Migrazio Tradizionalak (XIX. mende erdialdetik 1975era)

XIX. mendearen erdialdearen eta 1975eko krisi ekonomikoaren artean izan ziren. Garai horretan, emigrante kopuru handia irten zen Espainiatik itsasoz bestaldera eta mendebaldeko Europara.

Ozeanoz Bestalderako Emigrazio Tradizionala

Ozeanoz edo itsasoz bestalderako emigrazioa Latinoamerikara joan zen nagusiki, eta, neurri txikiagoan, Estatu Batuetara, Kanadara eta Australiara. Bi goren-aldi eta bi krisialdi bereiz daitezke:

A) Lehenengo Goren-Aldia (XIX. mende erdialdetik Lehen Mundu Gerrara, 1914)

Arrazoi nagusiak:

• Latinoamerikako herrialdeek immigranteak behar zituzten beren lurraldeak jendeztatzeko, ekonomia-baliabideak ustiatzeko eta azpiegitura handiak eraikitzeko; adibidez, Panamako kanala, trenbideak eta portuak.
• Espainiak trabak kendu zizkion emigrazioari, nekazaritza-eremu minifundista eta latifundistetan zegoen atzerapenerako eta langabeziarako irtenbide bihurtu baitzen.
• Eragina izan zuten, orobat, gazteek hirurteko soldadutza egitea saihestu nahiak eta senideen eta itzulitakoen dei-efektuak.

Emigranteen jatorria atlantikoa zen (Galizia, Asturias eta Kanariak). Haien helmuga nagusiak Argentinako Panpako nekazaritza-eremuak eta Kubako azukre- eta Brasilgo kafe-plantazioak ziren. Emigranteen profil bereizgarria hau zen: gizona, gaztea, ezkongabea, kualifikazio apalekoa eta nekazaria.

B) Ozeanoz Bestalderako Emigrazioaren Beherakada (Bi Mundu Gerren Artean, 1914-1945)

Arrazoi nagusiak:

• Lehen Mundu Gerrak sortutako segurtasun eza.
• 1929ko krisi ekonomikoaren ondorioak.
• Espainiako Gerra Zibila eta gerraostea (1936-1949).

C) Bigarren Goren-Aldia (1945-1960)

Ozeanoz bestalderako emigrazioa suspertu zen. Emigrazioari bultzada hori eman zioten faktoreak hauek izan ziren: Espainiatik askatasun osoz irteteko baimena (1946) eta Estatu Batuen jarrera-aldaketa Francoren erregimenari buruz. Emigranteen jatorriari dagokionez, iraganean bezala, asko Galizia eta Kanarietatik irten ziren. Helmuga eta helburu nagusiak hauek ziren: Venezuela eta hango petrolioaren ustiaketa, Argentina eta Brasil. Profila aldatu egin zen: kualifikazio maila handiagoa zuten, industriako langileak eta teknikariak.

D) Ozeanoz Bestalderako Emigrazioaren Jaitsiera (1960tik Aurrera)

1960az geroztik, ozeanoz bestalderako emigrazioa jaitsi zen.