Errege-erregina Katolikoen Estatu modernoa
Errege-erregina Katolikoen erreinaldiak monarkia autoritarioa ekarri zuen; Aro Modernoan nagusitu zen monarkia-eredu berria.
Monarkia autoritarioaren sorrera
Errege-erregina Katolikoek beren jabetzako lurretan beren autoritatea inposatzea zuten helburua; horretarako, noblezia eta Eliza mendean hartu zituzten, haien pribilegio ekonomiko eta sozialak mantentzearen truke.
Zenbait erakunde zituzten:
- Kontseiluak: Errege-erreginei aholku emateko funtzionarioen biltzarrak ziren.
- Errege-idazkariak: Errege-erreginen konfiantzazko gizonak ziren, eta kontseilu ugarien arteko lotura egiten zuten.
- Ermandade Santua: 1476an sortu zen, eta kriminalei segika ibiltzeaz arduratzen zen talde armatua zen.
- Ogasuneko errege-kontularitza: Zergak biltzeko erakundea zen.
- Errege-auzitegia: Kantzelaritza izenez ere ezagutzen zen; justizia kontrolatzeko eta eraginkorra izan zedin sortu zuten.
- Armada profesionala: Monarkek ordaintzen zuten eta haien zerbitzura zegoen. Nobleziaren tropak ordezkatu zituzten.
- Korrejidoreak: Hirietako boterea kontrolatzeko, udaleko funtzionarioak ziren.
Ordena militarrak monarkiaren kontrolpean jarri ziren eta erregeordearen figura sortu zen, monarken ordezkari izateko Koroaren erresumetako bakoitzean.
Erlijio-batasuna
Errege-erregina Katolikoen helburu nagusietako bat erlijio-batasuna lortzea izan zen; 1492an Juduen nahitaezko konbertsioa agindu zuten dekretu bidez. Kristautasunari atxiki zitzaizkionei kristautu deitu zitzaien.
Granadako Erresuma konkistatu ostean, errege-erreginek Granadako kapitulazioak sinatu zituzten, eta horiek musulman granadarren askatasun erlijiosoa bermatu zuten. 1499an Cisneros kardinalak nahitaez bataiatzera behartu zituen, hura Gaztela osora zabaldu zen. Gehienek bataiatzea erabaki zuten eta, ordutik aurrera morisko deitu zitzaien.
Heresiak amaitzeko eta fede katolikotik urruntzen zirenei jazartzeko, 1478an Inkisizioaren auzitegia berrezarri zen. Kristautuak eta moriskoak auzitegi haren helburu nagusi bilakatu ziren. XVI. mendearen hasiera arte, garai batean judu izandakoek errepresio handiagoa jasan zuten.