Agustinen Filosofia: Platonen eta Neoplatonismoaren Eragina
Platonen Filosofiaren Eragina Agustinengan
Platonen filosofiak eragin handia izan zuen Agustinengan. Haren pentsamenduak Agustinen ikuspegi filosofikoaren oinarriak ezarri zituen, nahiz eta Agustinek bere fede kristauaren argitan egokitu eta berrinterpretatu zituen ideia asko.
Ontologia: Jainkoa eta Bi Munduen Teoria
Ontologiari dagokionez, Agustinek Platonen bi munduen existentzia onartzen badu ere (mundu sentigarria eta mundu ulergarria), Ideien mundua ez da Jainkoarekin bateragarria, biak absolutuak baitira. Hori azaltzeko, Neoplatonismoa eta Plotinoren pentsamendua aurki ditzakegu erdibide gisa. Filosofia platondar honek Platonen pentsamenduaz gain, beste antzinako filosofien ideiak elkartzen ditu. Plotinoren filosofiaren gailurrean Bat-a dago, izaki ororen aurretik aurkitzen dena, ezaugarri ezagutezinezkoak dituena, eta gauza guztiak berarengandik datoz eta berarengana itzultzen dira. Horren ordez, Agustinek Jainkoa proposatzen du Bat-aren lekuan, Plotinoren eragina argi utziz. Zentzumenezko munduari dagokionez, Kristautasunak Jainkoak mundua ex nihilo (ezerezetik) sortu zuela dio; Platonentzat, aldiz, formagabeko materia betierekoa da, ideiak (formak) bezala.
Antropologia: Arima eta Gorputzaren Dualismoa
Antropologiari dagokionez, pitagorikoen eta Platonen eragina nabaria da. Gizakiok bi printzipioz osatuta gaude (dualismo antropologikoa): arima, materiagabea eta hilezkorra; eta gorputza, materiala eta hilkorra. Agustinentzat arima ez da betierekoa, Jainkoak berak sortu baitu, Platonen anamnesiaren eta Pitagorikoen arimaren transmigrazioaren ideiak baztertuz.
Epistemologia: Fedea eta Arrazoiaren Bidea
Epistemologiari dagokionez ere, Platonen eragina antzematen dugu Agustinek zentzumenen ezagutza mespretxatzean eta ongia lortzeko arrazoia erabili behar dela baieztatzean. Hala ere, gizakiak fedea ere behar duela dio, honela erabateko zoriontasunera eramango dion ideia nagusia edo Jainkoa bereganatzen baitu. Hori ezagutzaren azken mailan lor dezakegu, gure ariman agertzen zaizkigun betiereko ideiak (Jainkoak jarritakoak) kontenplatuz; horretarako, Jainkoaren argitzapena ezinbestekoa izanik.
Ezagutza Metodoak: Dialektika eta Autokontzientzia
Platonentzat ezagutza-metodoa dialektika zen, elkarrizketa bidez egia lortu nahi duenaren jarduera. Agustinentzat, dialektika barne-bilaketa bat da, autokontzientzia. Platonen kasuan Ongiaren Ideiak argiztatzen bazituen beste guztiak, Agustinentzat Jainkoaren argitzapenak egiten ditu ikusgarri Jainkoak berak ariman jarri dituen betiereko ideia eredugarriak.